Фото: Стевче Јакимовски
Градоначалникот на Општина Карпош, Стевчо Јакимовски, преку објава на својот официјален Фејсбук профил информираше за откриена нелегална градба на зграда лоцирана на улицата Козле.
Како што наведува Јакимовски, општинските инспектори излегле на терен по пријава за санација на покривна конструкција, која наводно се изведувала поради проблем со протекување.
Сепак, при увидот било утврдено дека на самото место се градат четири засебни простории, што, според инспекцискиот извештај, упатува на обид за изградба на четири нови станбени единици – целосно спротивно на издадената дозвола и важечката регулатива.
„Денес, заедно со градежниот инспектор и раководителот на Инспекторатот, излеговме на терен – улица Козле бр.17. Извршивме увид на настрешница поставена на зграда со рамна плоча. Иако дел од станарите добиле одобрение за кос покрив поради наводно течење, утврдивме дека изведбата НЕ е согласно одобрениот проект! Просторот е поделен на 4 дела – со подготовки за кујни и тоалети – што јасно укажува на обид да се направат уште 4 нови станови, и незаконски да се добие уште еден кат во објектот! Инспекторот изготви записник, а ќе следи и решение за уривање, или обврска граѓаните сами да ја отстранат оваа дивоградба!“, објави Јакимовски.
