Населбата Радишани наскоро ќе добие современ и функционален парк кој ќе опфати површина од речиси 10.000 квадратни метри. Од таа површина, околу 6.000 м² ќе бидат уредени со зеленило, а останатите 4.000 м² ќе бидат наменети за пешачки патеки, урбана опрема за одмор и рекреација, како и големо модерно детско игралиште кое ќе ги задоволи потребите на најмладите жители.
Овој значаен инфраструктурен проект е вреден 20 милиони денари и се реализира со поддршка од Владата на Република Македонија, како дел од заложбите за унапредување на урбаното живеење и подобрување на квалитетот на живот во скопските населби.
Во јавноста се појавија одредени недоразбирања во врска со статусот на земјиштето на кое ќе се гради паркот. За појаснување, станува збор за вкупна површина од 9.618 м², од кои 4.843 м² се во сопственост на Република Македонија, а преостанатите 4.784 м² се во сопственост на Македонската православна црква.
Со целосна согласност и соработка, на 8 октомври 2024 година, Општина Бутел склучи договор со МПЦ за пренос на правото на градење. Со тоа, локалната самоуправа доби правна основа да ја реализира паркот и на делот од земјиштето кое припаѓа на Црквата. Се работи за проект од јавен интерес, кој е наменет исклучиво за доброто на жителите на Радишани и пошироката околина.
Дополнително, во планската рамка на просторот е предвидена и изградба на православен храм, што ќе се реализира по строго почитување на сите законски регулативи и процедури.
