Фото: Ѓорѓи Ѓорѓиев
Две лица се фатени како во текот на два дена краделе предмети оставени во чест на прерано починатиот тапанар на групата ДНК, Ѓорги Ѓоргиев, кој трагично го загуби животот во пожарот што ја зафати дискотеката „Пулс“ во Кочани.
Нивната кражба била забележана и спречена од таткото на Ѓоргиев, кој потоа ја алармирал полицијата. По неговата пријава, екипи од Министерството за внатрешни работи интервенирале и ги фатиле сторителите.
Иако стореното дело предизвикало згрозеност и осуда во јавноста, крадците не можат да бидат кривично гонети од државата, бидејќи вредноста на украдените предмети не достигнува законски праг за јавен прогон.
„Во полициската станица Струмица Д.Ѓ.(46) од Струмица пријавил дека од надгробно место на неговиот покоен син лоцирано на Градските гробишта во Струмица биле одземени украси и други предмети. По преземените мерки од СВР Струмица се откриени сторителите на делото, при што е утврдено дека се работи за лицата В.С.(61) и Т.С.(60) и двајцата од село Баница, струмичко“, соопштија од МВР за „Скопје1“.
