Лидерот на движењето „Македонски концепт“, Петар Богојески, денеска најави дека ќе покрене правна постапка против повеќе физички и правни субјекти.
Како што посочи, станува збор за лица и организации чии активности, според него, биле насочени кон создавање атмосфера на јавен линч, ширење омраза и поттикнување закани.
Според Богојески, овие постапки не само што ја нарушуваат неговата безбедност и лична слобода, туку претставуваат и сериозна закана за физичкиот и психолошкиот интегритет на неговото семејство.
Богојески неодамна беше поставен за директор на Националната агенција за европски образовни програми и мобилност, а за неговото поставување имаше реакции од опозициските СДСМ и ДУИ.
„Почитувани пријатели, почитувани граѓани, почитувана јавност,
Ве информирам дека ќе отпочнам правна постапка пред надлежните институции против правни и физички лица, меѓу кои се и одредени политички партии, нивни функционери, невладини организации, самонаречени новинари и поединци поврзани со претходната власт на дуи и сдсм. Овие субјекти се инволвирани во креирање и ширење на лажни информации и материјали, лажни профили на социјални мрежи со украден личен идентитет, лични навреди, дисквалификации, говор на омраза, омаловажување и клевети.
Нивното делување има за цел создавање на атмосфера на јавен линч и поттикнување закани, со што директно се загрозени мојот личен и физички интегритет, но за жал и на моето семејство. Дел од тие креирани лажни профили и материјали, закани за физичка ликвидација и сл. веќе се пријавени во Министерството за внатрешни работи и надлежните институции преземаат мерки согласно законските надлежности.
Потенцирам дека во претходните неколку денови беа креирани серија на лажни профили со мој идентитет, на сите можни социјални мрежи, за што јас навремено, јавно информирав. Нивната намена беше да фабрикуваат, а во текот на последните два дена масовно да споделуваат фалсификувани и креирани, не од мене ставови, статуси и коментари на социјалните мрежи.
Јавноста ќе биде навремено информирана за понатамошните чекори и развојот на постапката“, информира Богојески.
