Фото: Принтскрин
Истрагата за смртоносниот пожар што избувна во импровизираната дискотека „Пулс“ во Кочани, каде животот го загубија 61 лице, добива нови димензии. Според информации до кои дојде „360 Степени“, обвинителството веќе отвори постапка против уште 23 лица, проширувајќи ја листата на осомничени за оваа трагедија.
Меѓу новоосомничените, како што дознава медиумот од извори блиски до истрагата, се и поранешните министри за економија Ваљон Сарачини и Беким Незири – двајцата поврзани со Демократската унија за интеграција (ДУИ), како и сегашниот министер без ресор Шабан Салиу, кој во минатото бил директор на Дирекцијата за заштита и спасување (ДЗС). Приведениот список го вклучува и актуелниот директор на истата институција, Џеват Селами, кој доаѓа од редовите на политичката платформа ВЛЕН.
Од вкупно 23-те нови осомничени, 19 лица веќе се приведени или се во процес на приведување. За едно лице е потврдено дека не се наоѓа во земјата – станува збор за Дритон Кучи, уште еден поранешен министер за економија од редовите на ДУИ, кој во моментов ја извршува функцијата амбасадор на Македонија во Кралството Норвешка.
Извор: 360 Степени
