Одлуката на Основниот суд во Тетово да изрече казна затвор од само две години за Менсур Пајазити, обвинет за сообраќајната несреќа во која трагично загина 22-годишната Теодора Ристевска, предизвика бурни реакции во јавноста. Несреќата се случи во септември 2022 година, кога Ристевска беше прегазена на обележан пешачки премин во центарот на Тетово.
Иако првичната пресуда предвидуваше казна од три и пол години затвор, по жалбата поднесена од страна на одбраната, Вишото јавно обвинителство во Гостивар ја прифати иницијативата, по што Апелациониот суд во Гостивар донесе одлука за намалување на казната на две години.
„Колку вреди животот во Македонија? Колку вреди животот на сестра ми, дали животот некој може да ѝ го врати? Дали нејзината младост може некој да ја врати? Мојата младост дали може некој да ја врати? Мојата душа дали може некој да ја врати?“, прашува Ева.
