Судијата кој сам си ги менувал оценките денеска пресуди за прегазената девојка во Тетово

Судијата Ељведин Ферати, кој денеска ја изрече контроверзната пресуда со која на Менсур Пајазити му одреди казна од само две години затвор за прегазувањето и смртта на 22-годишната Теодора Ристевска на пешачки премин во Тетово, и претходно бил дел од скандал што ја потресе академската и правосудната јавност, објави „Слободен печат“.

Во декември 2023 година, Ферати беше предмет на истрага од страна на Државниот просветен инспекторат, кој постапи по пријава од Државната комисија за спречување на корупција (ДКСК). Според наодите од инспекцијата, тој самоволно ги менувал своите оценки во студентската книшка на Правниот факултет при Државниот универзитет во Тетово (ДУТ), со цел да прикаже повисок просек од реално стекнатиот.

Конкретно, во документацијата што ја доставил при аплицирање за Академијата за судии и јавни обвинители, прикажал лажен просек од 8,20, иако вистинскиот бил 7,88.