Фото: Принтскрин
Семејствата на настраданите во трагичниот пожар во Кочани најавија мирен протестен марш под наслов „Марш на ангелите“, кој ќе се одржи низ улиците на градот. Преку овој симболичен чин, тие ќе побараат правда за своите најблиски и ќе потсетат на болката што ја носат секојдневно.
Според најавите, маршот ќе започне од Градскиот парк во Кочани, по што колоната ќе се упати кон клучни институции во градот – Трговскиот центар, зградата на Општина Кочани, локалната полициска станица (МВР Кочани), како и Основниот суд. Секоја локација е избрана со цел да се испрати јасна порака до надлежните органи.
Организаторите потенцираат дека овој марш е начин на кој уште еднаш ќе го изразат своето незадоволство од текот на институционалните процеси и ќе ја нагласат својата решителност да не се откажат од борбата за вистина и правда.
