Во Основниот суд во Тетово денеска повторно се одржува рочиште за повторното судење во врска со трагичниот пожар во Модуларната болница во Тетово, кој се случи на 8 септември 2021 година. Во оваа несреќа животот го загубија 14 пациенти кои се лекуваа од Ковид-19, а трагедијата остави длабоки последици врз општеството и семејствата на жртвите.
Пред почетокот на судењето, семејствата на починатите јавно истакнаа дека постојат сериозни докази за пропусти при изградбата на модуларната болница, кои, според нив, би можеле да бидат главната причина за избувнувањето на пожарот. Тие изразија незадоволство од досегашниот тек на судскиот процес, оценувајќи дека постои можност за намерно одолговлекување на постапката.
Во своето обраќање, семејствата настраданите повторија барање за формирање на независен истражен тим, кој ќе ги разгледа сите аспекти на случајот, вклучително и одговорноста на надлежните институции и можните пропусти во судската процедура. Тие очекуваат објективна и транспарентна истрага, како и правда за нивните блиски, со надеж дека ваква трагедија никогаш повеќе нема да се повтори.
