Фото: Принтскрин
Претседателот на Европскиот совет, Антонио Кошта, изјави денеска дека царините што ги воведоа Соединетите Американски Држави треба да ја поттикнат Европа да склучи трговски договори со други партнери низ светот.
Откако американскиот претседател Доналд Трамп во средата воведе реципрочни царини од 20 отсто на стоките од ЕУ што се увезуваат во САД, Кошта на социјалната мрежа „X“ порача дека Европската унија ќе продолжи да ја зајакнува својата трговска мрежа.
Претседателката на Европската комисија, Урсула фон дер Лајен, претходно остро ги критикуваше новите царини, предупредувајќи дека тие ќе имаат „катастрофални последици“ врз економијата и милиони луѓе ширум светот.
„Да бидеме јасни за огромните последици: глобалната економија ќе претрпи сериозен удар, неизвесноста ќе се зголеми, а протекционистичките мерки ќе продолжат да се шират. Последиците ќе бидат страшни за милиони луѓе низ целиот свет,“ оцени Фон дер Лајен, пренесе „Би-Би-Си“.
