Фото: Принтскрин
На денешното рочиште сведочеше сообвинетиот Влатко Кешишев, кој откри детали за својата поврзаност со обвинетиот Палевски. Според неговите искази, тој од 2021 година волонтирал за Палевски, помагајќи му со секојдневни обврски како подготовка на храна и чистење, додека овој ја организирал и оформувал својата политичка партија „Десна“.
На директното прашање од одбраната, Кешишев призна дека учествувал во ископувањето на дупка во Велес. Како што изјави, копањето се одвивало исклучиво во неделите, бидејќи тогаш сообвинетиот Велибор Манев бил слободен и можел да учествува.
Палевски беше отстранет од судницата затоа што адвокатот на Кешишев кажа дека тој се плаши од осомничениот за убиството на Вања Ѓорческа и Панче.
„Вељо копаше, а јас фрлав земја. Мислев дека бараме, копаме злато. Молчевме, не разговаравме. Третиот пат кога бевме таму, Вељо ме предупреди дека за ова може да паднат глави и дека не смееме да зборуваме. Дупката била наменета за киднапирање на лица. Четвртиот пат ја довршивме дупката. Велибор ја поклопи со даски. Се вративме во штабот и му кажавме на Палчо дека сè е во ред и дека дупката е доволно длабока”, кажа Кешишев.
