Пратеникот од ВМРО-ДПМНЕ, Бране Петрушевски, кој прима основна плата од 116.000 денари, без вклучени додатоци, денеска на прес-конференција упати критики кон раководството на Синдикатот, обвинувајќи ги дека нивните примања надминуваат 50.000 денари.
Сепак, важно е да се нагласи дека Синдикатот не е буџетска институција и не добива средства од државниот буџет, туку се финансира исклучиво од членарината на своите над 75.000 членови. Со ова, раководството на Синдикатот посочи дека нивните примања произлегуваат од придонесите на синдикалното членство, а не од јавните финансии.
„Според информациите кои стигнаа до нас од свиркачи од ССМ, Стојанче Кашиковски, претседател на синдикатот на работниците од угостителството, туризмот и комунално-станбено стопанство остварува и дополнителни годишни примања покрај платата. Вкупните примања на Кашиковски во 2023 година, во кои влегува неговата плата и примања по други основи, биле над 810.000 денари. Ова се синдикалците на Трендафилов и ССМ, не се знае кој од кој поголеми примања има. Според свиркачите од ССМ, кои се разочарани од актуелното раководство, Трендафилов и луѓето околу него го претвориле синдикатот во приватна фирма. Трендафилов и луѓето околу него одработуваат за нивните позиции по ноти на СДСМ, кои и ги поставија на нелегитимен начин. Ова се луѓето кои додека ги лажат работниците за минималец, тие земаат плати неколку пати поголеми од тоа од синдикатот“, рече Петрушевски.
