Партијата „Левица“ во соопштение до јавноста остро го осуди, како што наведува, „неоправданиот и неодговорен платен распуст“ на пратениците. Тие ја критикуваат оваа практика како пример за недомаќинско трошење на јавните средства и недоволна посветеност на законодавниот процес.
Дополнително, од „Левица“ информираат дека на утрешната собраниска седница, закажана за вторник, на дневен ред ќе бидат ставени два предлог-закони поднесени од нивната пратеничка група.
„Првиот е задолжителна исплата на платата до 5-ти наместо до 15-ти во месецот, затоа што работникот не смее да биде оставен во неизвесност, присилен да зема брзи кредити, да влегува во дозволени минуси или да се изложува на позајмици со високи камати додека чека половина месец за парите што чесно ги заработил. Зголемување на породилното отсуство од 9 на 18 месеци, со цел подобрување на социјалната и економската заштита на мајките и семејствата, нивно психофизичко закрепнување и развој, како и градење на здрава врска без страв од финансиска несигурност. Секое дете заслужува стабилен почеток во животот, а секоја мајка право на достоинствено мајчинство“, соопштија од „Левица“.
