Осумнаесетгодишниот Христијан Стојанов е еден од хероите кои храбро реагираа за време на трагедијата во дискотеката „Пулс“ во Кочани. Без двоумење за сопствената безбедност, тој влетал во огнот со единствена цел – да спасува животи.
Стојанов, кој е ученик во средното текстилно училиште во Штип, во интервју за штипската телевизија „ТВ Стар“ зборуваше за драматичните моменти што ги доживеал ноќта на 16 март.
„Кога ја видовме глетката пред дискотеката, се погледнавме со мојот близок другар Давид Симонов и знаевме дека треба да влеземе внатре. Не се сеќавам како успеав да ја натопам маицата, но ја ставив на устата и влегов внатре. Им подававме рака и ги влечевме надвор. Оние кои беа онесвестени ги носевме пред дискотеката. Имаше надвор луѓе кои што немаа храброст да влезат внатре во диското, но ги преземаа повредените пред влезот, па ги носеа на страна да пробааат да ги освестат или да ги однесат в болница“, кажа Стојанов.
Видео: ТВ Стар
