69-годишната Ангелина Талеска од Прилеп, која едвај врзува крај со крај со својата социјална пензија од нешто помалку од 8.000 денари, се соочува со огромен проблем – сметка за струја од неверојатни 15.000 денари, објави „Алфа“.
Талеска живее сама, како потстанар во скромен, мрачен подрум, без основни електрични уреди, освен светилки и телевизор. Се грее на дрва, а дополнителна тешкотија ѝ претставува фактот што неодамна преживеала ненадеен мозочен удар, поради што три месеци не била ниту дома – цело тоа време била на лекување.
По враќањето, ја дочекала шокантната сметка за струја, за која тврди дека е неоправдана, бидејќи нејзината потрошувачка е минимална. Сега, соочена со финансиски товар кој не може да го поднесе, бара помош и разбирање од надлежните, надевајќи се на праведно решение што ќе ја ослободи од плаќање на нешто што, како што вели, не го потрошила.
Извор: Алфа
