Неколку познати ноќни клубови во Скопје ставени се под клуч и нема да можат да ја продолжат својата работа сè додека не ги исполнат законските услови за безбедност и заштита. Дирекцијата за заштита и спасување ја спроведе контролата, но детали за натамошните постапки засега не откриваат, наведувајќи дека акцијата сè уште е во тек.
Меѓу локалите кои добиле забрана за работа, според информации на „Телма“, се вбројуваат популарните клубови „Станица 26“, „Маракана“, „Балет“, „Пјур“, „Епицентар“ и уште неколку угостителски објекти. Причината за затворањето е тоа што не ги исполнувале потребните стандарди и мерки за заштита и спасување.
Иако на вратите од клубовите нема поставена пломба, тие остануваат затворени и нема да им биде дозволено повторно отворање додека не ги отстранат констатираните недостатоци. Според неофицијални информации, кај дел од локалите, како што е случајот со „Станица 26“, постои важечка лиценца, но е потребно да се достават дополнителни документи за да можат повторно да работат.
Извор: Телма
