Митингот што го најави партијата на српскиот претседател Александар Вучиќ, кој требаше да биде одржан како одговор на студентскиот протест од 15 март, е одложен, пренесуваат српските медиуми.
Иако засега нема официјална потврда од организаторите, извесно е дека најавениот собир нема да се одржи на 28 март, како што претходно беше најавено.
Вучиќ на 10 март ги повика граѓаните да се приклучат на, како што ја нарече, „најголемата средба на чесната Србија“, на митинг што требаше да се одржи во Белград. Апелот беше упатен до работниците, земјоделците и сите поддржувачи на владејачката партија.
Сепак, според неофицијални извори, подготовките за настанот се стопирани. Вработените во јавниот сектор не добиле никакви задолженија поврзани со организацијата, јавниот превоз функционира нормално, а списоците со квоти и организирани превози не се појавиле.
Иако нов точен датум сè уште не е соопштен, неофицијални информации од кругови блиски до Српската напредна партија (СНС) велат дека митингот најверојатно ќе биде одложен за втората половина на април.
