Поранешниот член на Советот на Град Скопје, Петар Шапе, преку објава на „Фејсбук“ најави дека ќе покрене иницијатива за преименување на Младинскиот културен центар (МКЦ).
Шапе ќе предложи МКЦ да го добие името на прерано починатиот музичар Андреј Ѓорѓиески, член на групата „ДНК“, кој трагично го загуби животот во пожарот што неодамна ја зафати дискотеката „Пулс“ во Кочани.
Со оваа граѓанска иницијатива, како што наведува Шапе, ќе се оддаде почит кон ликот и делото на младиот артист, кој остави белег на македонската музичка сцена и кој, за жал, го загуби животот на трагичен начин.
„Како поранешен советник во советот на градот Скопје, во периодот што следи ќе поднесам предлог граѓанска иницијатива, Младинскиот културен центар-МКЦ Скопје, да го носи името на прерано починатата музичка ѕвезда Андреј Ѓорѓиески-ДНК, уметник, хуманист, а пред сè Човек, кој својот живот го жртвуваше за да спаси други млади луѓе“, смета тој.
