Седумнаесет лица кои беа повредени во трагичниот пожар во Кочани моментално се наоѓаат на лекување во Ургентниот центар при Универзитетскиот клинички центар на Србија во Белград. Од нив, две лица се на механичка вентилација, а двајца веќе биле подложени на хируршки интервенции, информираше др Милан Стојичиќ, директор на Клиниката за пластична и реконструктивна хирургија при УКЦС, јавува дописникот на МИА од Белград.
Стојичиќ потенцираше дека пациентите се во стабилна општа состојба, а досегашниот постоперативен тек поминува без сериозни компликации.
„Засега закрепнувањето тече според очекувањата и без поголеми проблеми. Во текот на наредната седмица планираме да извршиме хируршки зафати и кај уште пет до шест пациенти. Дополнително, имаме и позитивни вести – неколку од пациентите покажуваат значително подобрување, па постои можност наскоро да бидат префрлени на одделение, бидејќи нивната респираторна функција се стабилизира, а изгорениците не бараат понатамошен престој во Интензивна нега“, изјави тој за РТС.
