Државниот јавен обвинител, Љупчо Коцевски, информираше дека во истрагата за трагедијата во Кочани засега како осомничени се водат 27 физички лица. Кочанското обвинителство веќе предложило мерки за обезбедување на нивното присуство во текот на постапката. За 24 од нив е побаран притвор, додека за тројца лица таквата мерка не е предложена, бидејќи во моментов се наоѓаат на болничко лекување поради повреди здобиени во пожарот.
Коцевски појасни дека кривичната одговорност ја сносат повеќе категории: лица кои биле инволвирани во процесот на издавање лиценци за работа на објектот, надлежните инспекциски органи кои не спровеле соодветен надзор и контроли, сопственикот на објектот кој управувал со дискотеката, како и член на музичката група ДНК која настапувала вечерта на инцидентот.
„Сите осомничени, секој од аспект на своето својство, во периодот од 2012 година до 16.03.2025 година, сите заеднички, воопшто не постапиле според прописите за мерки за заштита и така предизвикале опасност за животот и телото на луѓето и имотот од невидени размери“, соопшти Коцевски.
