Ние како портал, кој секогаш се труди да известува објективно и со почит кон граѓаните, испраќаме јасен и недвосмислен апел до сите новинари, а особено до оние што го изгубиле секое чувство за човечност – ПРЕСТАНЕТЕ ДА ГО ПРОДАВАТЕ ЧОВЕЧКОТО СТРАДАЊЕ КАКО СЕНЗАЦИЈА!
Денес не е ден за камери, не е ден за кликови, не е ден за вашите евтини сензационализми! Денес е ден на тага, болка и последен поздрав за младите животи кои згаснаа во страшната трагедија. Па затоа сметаме дека апсолутно НЕ ТРЕБА да се снимаат тажните сцени од гробиштата во Кочани, каде што ќе бидат погребани младите лица кои го загубија животот во пожарот во дискотеката „Пулс“.
Да се снимаат гробиштата, да се доловуваат најтажните мигови на семејствата и да се објавуваат тие сцени во медиумите е не само неетичко, туку и крајно нечовечно. Ова не е новинарство – ова е бездушна експлоатација на туѓата болка!
Апелираме до сите медиуми веднаш да престанат со објавување на вакви содржини а веќе постоечките да ги избришат! Оној што има барем трошка достоинство, ќе знае дека ова не е содржина која треба да биде споделена, туку момент кој заслужува тишина, почит и емпатија.
Сочувствуваме со семејствата на настраданите и во знак на почит, нашиот портал нема да објавува сцени од денешниот ден. Ги повикуваме и останатите медиуми да направат истото.
Во продолжение го пренесуваме статусот на профилот „Кочани“ на Фејсбук, каде што се замолуваат новинарските екипи да не прават сензација од испраќањето во вечен мир на жртвите.
Нека почиваат во мир младите души.
