Поранешниот министер за економија, Крешник Бектеши, кој од вчера се наоѓа во полициска станица, денеска е спроведен во притвор. Тој беше приведен заради давање исказ во рамки на истрагата за трагичниот пожар што се случи во дискотеката во Кочани.
Бектеши вчера беше повикан на информативен разговор, а по завршеното сослушување, надлежните органи одлучија да му одредат мерка притвор додека трае истрагата.
„Во моментот се приведени и задржани 14 лица во полициските станици, меѓу кои е и поранешниот министер Крешник Бектеши. Обвинителството за сите нив ќе побара одредување мерка краткотраен притвор. Во оваа фаза од постапката може да им биде одреден само 48-часовен притвор, но по формално отворање на истрагата, постои можност притворот да биде продолжен и на 30 дена“, кажаа од Обвинителството.
