Според најновите информации од Министерството за внатрешни работи, трагичниот настан во кочанската дискотека досега однел 51 човечки живот, а над 100 лица се хоспитализирани, изјави министерот за внатрешни работи, Панче Тошковски, при неговата денешна изјава од Кочани. Како што додаде, за случајот веќе се приведени неколку лица поврзани со настанот.
Министерот појасни дека првичните анализи укажуваат оти пожарот настанал како резултат на искрење од пиротехнички средства што биле користени за светлосни ефекти за време на настанот.
„Се претпоставува дека искрите ја зафатиле таванската конструкција, која била изработена од материјал со висока запалливост. Огнот многу брзо се проширил, а просторот бил исполнет со густ чад кој дополнително придонел за трагичните последици“, нагласи Тошковски.
