Министерот за здравство, Арбен Таравари, соопшти дека сите повредени лица од трагичниот пожар во дискотеката во Кочани се хоспитализирани и добиваат соодветна медицинска грижа во државните здравствени установи, вклучувајќи ги и клиниките во Скопје.
Тој нагласи дека болниците во моментов располагаат со доволно капацитети за згрижување на сите повредени, а дополнително била понудена и помош од неколку соседни земји, доколку се појави потреба.
„Во овој момент, низ болниците во државата се згрижени 118 пациенти – најголем дел се сместени во Кочани и Штип, а дел се наоѓаат и во скопските клиники. Наскоро ќе направиме посета и на Клиничката болница, особено на одделите за хирургија и Карил, за да се информираме одблиску за нивната здравствена состојба. Неколку повредени се префрлени и на одделот за пластична хирургија и детска хирургија“, изјави Таравари.
