Основното јавно обвинителство Скопје покрена постапка против 24-годишен осомничен, кој се товари за кривично дело „Тешки дела против безбедноста на луѓето и имотот во сообраќајот“ согласно член 300, став 4 од Кривичниот законик.
„Вчера попладне осомничениот управувал автомобил „фиат панда“ со скопски регистарски ознаки и на улицата Ацо Шопов со возилото се движел зад автомобил „пежо 2008“. Меѓутоа, не ги почитувал надолжните ознаки на коловозот, односно надолжно обележана бела полна линија и со возилото преку полната линија започнал да го престигнува автомобилот „пежо“, управувано од друга учесничка. Спротивно на прописите за безбедност на сообраќајот, осомничениот преминал на дел од коловозот наменет за движење на возилата од спротивната насока, па директно се судрил со мотоцикл „сузуки“ кој доаѓал од другата страна. По сударот со телото удрил во плетена жичана ограда и паднал на коловозот. Од ударот се здобил со тешки телесни повреди и починал на КАРИЛ“, се вели во соопштението.
По наредба на јавен обвинител, се додава, веднаш по настанот земени се примероци од крв на сите тројца учесници во сообраќајката.
„Кај осомничениот и другата учесничка не е утврдено присуство на алкохол или други опојни средства, додека присуство на алхохол во крвта од 0,56 промили е евидентирано само кај сега починатиот мотоциклист“, соопшти обвинителството.
