Фото: Принтскрин
Руските власти ѝ предале на САД список со барања за постигнување договор со кој би завршила војната што Москва ја води против Украина, а кој исто така би овозможил ресетирање на односите со Вашингтон. Ова го објави Ројтерс, повикувајќи се на два извора запознаени со темата.
Британската агенција не наведува што точно се наоѓа на списокот со барања испратен од Москва, ниту пак дали Русија е подготвена да се вклучи во мировни преговори со Киев пред Америка да ги прифати нејзините услови.
Изворите на Ројтерс овие услови ги опишале како општи и слични на барањата што Москва претходно ѝ ги поставила на Украина, САД и НАТО.
Тие претходни услови вклучувале барање Украина да не стане членка на НАТО, како и договор што би забранил распоредување на странски воени трупи во Украина, но и меѓународно признавање на тврдењето на рускиот претседател Владимир Путин дека полуостровот Крим и четири украински области ѝ припаѓаат на Русија.
Се потсетува дека Русија во изминатите години исто така барала од САД и НАТО да се позанимаваат со, како што го нарекува, „коренот на проблемот“ што довел до војната, вклучувајќи го и проширувањето на Алијансата кон исток.
