Во синоќешното издание на емисијата „24 анализа“ на телевизија 24 гостуваше пратеникот од ВМРО-ДПМНЕ, Бране Петрушевски, кој даде предлог минималната плата да се изедначи со примањата на Слободан Трендафилов од ССМ, како и да се обезбедат еднакви привилегии за сите работници.
Петрушевски нагласи дека платите во повеќе сектори, вклучително здравството, образованието и полицијата, веќе се зголемени, вклучувајќи ја и минималната плата. Според него, освен квантитативното зголемување, значајно е да се постигне и повисока реална вредност на платите, што ќе придонесе за подобрување на животниот стандард на граѓаните.
„Зголемувањето на платите е реалност. Веќе имаме раст во неколку клучни области, а најавуваме и дополнителни зголемувања. Оваа Влада е решена да создаде подобри економски услови и да го подигне стандардот на граѓаните. Економијата повеќе не е во стагнација, туку се движиме кон опоравување. Разликата во однос на претходните периоди е што не се фокусираме само на номиналното зголемување на платите, туку и на нивната реална куповна моќ“, истакна Петрушевски.
