На денешното рочиште за случајот што ја потресе македонската јавност, сведочеше обвинетиот Велибор Манев, откривајќи нови детали за планирањето и извршувањето на двојното злосторство во кое животите ги загубија Вања Ѓорчевска и Панче Жежовски.
Според сведочењето на Манев, Жежовски бил цел на грабнување поради долг што го имал кон него, но и поради неговото возило – сивиот Цитроен, кој требало да се искористи за реализација на второто грабнување.
Кога станува збор за второто грабнување, Манев изјави дека Палевски првично разгледувал неколку потенцијални жртви. Една од нив била ќерка на пензиониран скопски бизнисмен кој живеел во истата зграда од каде што беше киднапирана Вања. Во една од неговите претходни изјави, Палевски, наводно, спомнал и друга потенцијална жртва – жена на возраст од 38 до 40 години, за која се верувало дека потекнува од богато семејство.
Манев детално ја опиша кобната вечер, истакнувајќи дека заедно со Видевски чекале во влезот на зградата до 7:20 часот. Токму во тој момент, Видевски ја пресретнал девојката, ја грабнал, а Манев, кој се наоѓал на скалите пред лифтот, ја врзал и ја внел во возилото Цитроен, кое било паркирано во близина.
Според неговото сведочење, планот првично не вклучувал киднапирање на Вања. Но, фотографиите што Палевски претходно им ги покажувал на соучесниците наводно наликувале на девојчето, а во моментот на грабнувањето, поради темнината во влезот на зградата, тие не сфатиле дека избрале погрешна жртва.
