Градоначалникот на Општина Илинден, Александар Георгиевски, изврши теренски увид во градежните активности поврзани со изградбата на новиот здравствен дом, каде што во завршна фаза се изведуваат повеќе градежни работи.
Со изградбата на овој модерен здравствен објект, жителите на општината ќе добијат пристап до поширок спектар на медицински услуги во самото место на живеење, што значително ќе го намали нивниот пат до здравствена заштита. Досега, граѓаните беа принудени да патуваат околу дваесет километри за да ги задоволат своите основни здравствени потреби, а со овој проект нивниот квалитет на живот значително ќе се подобри.
Како што истакна градоначалникот Георгиевски, изградбата на новиот здравствен дом е резултат на барањата на жителите, особено имајќи предвид дека населението во општината постојано расте. Тој потсети дека на оваа локација претходно се наоѓала стара амбуланта, изградена пред повеќе од половина век, која повеќе не ги исполнуваше современите стандарди за здравствена заштита.
Новиот здравствен објект ќе има вкупна површина од околу 600 квадратни метри и ќе биде изграден на две нивоа. Објектот ќе располага со два влеза – главен и службен, две чекални, два административни шалтера, четири санитарни јазли и 14 ординации, опремени со современи медицински уреди.
