На денешното рочиште, обвинетиот Велибор Манев продолжи да ги изнесува деталите за шокантните злосторства што ја потресоа јавноста – киднапирањата и убиствата на велешанецот Панче Жежовски и 14-годишната Вања Ѓорчевска од Скопје.
Според неговото сведочење, операцијата била извршена под диригентската палка на првобвинетиот Љупчо Палевски, кого Манев го идентификува како мозокот на целата криминална организација.
Манев посочи дека со Боре Видевски бил пријател уште од детските и училишните денови, додека со Палевски се запознал во 2018 година преку социјалните мрежи. „Се запознавме преку Фејсбук. Подоцна го посетив во канцелариите на партијата, а потоа станав и член. Денеска сум овде поради него“, сведочеше Манев.
Тој исто така ја спомена улогата на Влатко Кешишев, за кого тврдеше дека бил неразделен со Палевски. „Кешишев беше негов човек од доверба – му готвеше, му ги одржуваше канцелариите. Тој е тука затоа што му ја даде својата лојалност на Палевски“, додаде обвинетиот.
Манев детално опиша како бил изведен планот за грабнување на Панче Жежовски. „Панче ме познаваше, па одлучивме Боре Видевски да тропне на неговата врата, да го турне внатре и да го врзе, додека ние останатите ќе влеземе. Инструкциите ги доби директно од Палевски, кој нè увери дека сè ќе оди според планот“, раскажува Манев.
Откако влегле во домот, со маски на лицата, Жежовски не можел да ги препознае напаѓачите. „Боре му ја стави раката преку уста за да не вика, а јас му ги врзував рацете. Во меѓувреме, Палевски се движеше низ куќата, ги најде и ги зеде клучевите од автомобилот. Ја отстрани церадата од ‘Ситроенот’ и го стартуваше возилото, додека јас и Боре го изнесовме Панче и го ставивме во багажникот“, опишува Манев.
Тој истакна дека потоа се упатиле кон местото каде што се наоѓала земуницата – локацијата каде што требало да го задржат жртвата. „На патот Палевски го фрли телефонот на Панче во провалија за да не може да се лоцира. Кога пристигнавме, го извадивме од автомобилот и го доведовме до отворот на земуницата. Беше легнат на земја, чекав да го одврзам за да го внесам внатре“, сведочи обвинетиот.
Манев го опиша моментот што засекогаш ќе го памети. Додека се наведнал да го одврзе Панче, одеднаш се слушнал истрел. „Палевски ладнокрвно му испука куршум во слепоочницата. Останав во шок, ми се слоши, се тресев од тоа што го видов“, вели Манев.
По егзекуцијата, Палевски го замотал телото во церада, а кога Манев го прашал зошто го направил тоа, добил ладнокрвен одговор: „Вака е почисто, немој да се секираш“.
Во своето сведочење, Манев призна дека веќе тогаш почувствувал дека не може да продолжи со вакви злосторства. „Му реков дека не сум ни замислувал дека ќе бидам дел од убиство. Тој ме удри со рака и ми рече: ‘Да не расипуваме пријателство, имаш убава фамилија’“, сведочеше обвинетиот.
