„Д Фестивал“, една од најпознатите музички и културни манифестации во земјата, оваа година го одбележува својот 15-годишен јубилеј со голема промена – наместо во Дојран, фестивалот ќе се одржи во Штип.
Според официјалната објава на Фејсбук страницата на фестивалот, новата локација ќе биде под Исарот, а настанот ќе трае од 4 до 6 јули.
Оваа промена означува значаен пресврт за фестивалот, кој повеќе од една деценија беше неразделен од брегот на Дојранското Езеро. Организаторите изразија благодарност кон сите што низ годините придонеле за развојот и успехот на „Д Фестивал“ во Дојран, истакнувајќи дека оваа промена претставува ново поглавје и можност за остварување на уште поголеми амбиции.
Иако одлуката да се напушти Дојран предизвика мешани реакции, тимот на фестивалот уверува дека новата локација ќе донесе свежа енергија и уште повозбудливо искуство за посетителите.
