Претставници на хрватското национално малцинство во Македонија истакнаа дека нивното официјално вклучување во Уставот на државата би било значаен чекор за зачувување и унапредување на нивниот културен и национален идентитет.
Оваа иницијатива, според нив, би придонела за поголема видливост и институционална поддршка во зачувувањето на нивните традиции, јазик и културни вредности. Овие ставови беа изнесени за време на средбата со претседателот на хрватскиот Сабор, Гордан Јандроковиќ, кој престојува во тридневна официјална посета на Македонија.
На заедничката прес-конференција со претседателот на македонското Собрание, Африм Гаши, Јандроковиќ нагласи дека односите меѓу Македонија и Хрватска се традиционално пријателски и исполнети со заемна почит, партнерство и симпатии, потсетувајќи на историските врски што ги поврзуваат двата народа.
Тој посочи дека Хрватите во Македонија се горди на својата припадност кон оваа држава, но во исто време негуваат љубов и кон своите хрватски корени.
