Незадоволни од високите сметки за електрична енергија за декември и јануари, граѓаните се организираат преку социјалните мрежи и најавуваат протест за да го искажат својот револт.
Според повикот што кружи на интернет, протестот е закажан за утре во 13:00 часот пред канцеларијата на ЕВН во скопската општина Бутел. Граѓаните бараат одговори за драстично зголемените суми на фактурите, кои за некои домаќинства достигнале износи од 35.000 до 75.000 денари.
На социјалните мрежи веќе се споделуваат фотографии од фактурите, при што многумина изразуваат сомнеж дека системот за пресметка на потрошената електрична енергија не е транспарентен и дека отчитувањето на броилата не се врши редовно.
Во меѓувреме, здруженијата на инженери вчера испратија барање до надлежните институции, истакнувајќи дека електричните броила треба да се отчитуваат секој месец, а не на подолги временски интервали.
