Предлогот на Сојузот на синдикати на Македонија (ССМ) за зголемување на минималната плата на 30.000 денари наиде на противење од страна на работодавачите. Според нив, ваквото барање е економски неоправдано и би можело да предизвика сериозни последици врз стопанството.
Синдикатите вчера побараа, покрај законското усогласување од околу 2.000 денари, со што минималната плата би достигнала 24.500 денари, дополнително зголемување за уште 6.000 денари, при што државата би ги покривала придонесите во период од една година.
Сепак, Организацијата на работодавачи смета дека ваквото зголемување е нереално и не кореспондира со продуктивноста на македонската економија.
„Лесно е да се бара минималец од 30.000 денари, но тоа претставува зголемување за над 40% во однос на сегашната минимална плата. Со што продуктивноста во Македонија пораснала за 40%, за да можеме да ја зголемиме минималната плата во толкав процент? Дополнително, во моментов минималната плата во земјава изнесува 72% од просечната плата, што не е случај во ниту една европска држава. Ова се желби на синдикатите, кои во последниот период успеаја да ги наметнат во јавноста“, изјави Ангел Димитров од Организацијата на работодавачи.
