ВМРО-ДПМНЕ упати обвинувања кон претседателот на Сојузот на синдикатите на Македонија (ССМ), Слободан Трендафилов, тврдејќи дека тој сè повеќе се однесува како гласноговорник на СДСМ.
Од партијата прашуваат дали неговите ставови и активности се форма на „враќање услуга“ за поддршката што ја добил при изборот за лидер на ССМ.
„Слободан Трендафилов како портпарол на СДС, им враќа ли за претседателското место во ССМ? Подолг период наназад претседателот на ССМ делува во целост усогласено со партиските соопштенија на СДС. Тоа што СДС ќе го пласира како политичка теза, Слободан Трендафилов го презема како синдикално делување. Барањата на ССМ се барања направено во СДС. Усогласената политика помеѓу СДС и ССМ има некои подлабоки корени, а за тоа кои се тие, ќе откриеме на денешната пресконференција“, велат од владејачката партија.
Трендафилов и ССМ вчера побараа минимална плата од 30.000 денари за граѓаните, а доколку не биде прифатено барањето, тогаш ќе излезат на улица. Тој сега во изјава за „Локално“ ги отфрли обвинувањата од владејачката партија.
„ССМ работи во интерес на работниците и нема да потпадне под никакви притисоци, а најмалку на тие кои доаѓаат од политичките партии кои во зависност од позицијата во која се наоѓаат, власт-опозиција се против работниците“, кажа Трендафилов за „Локално“.
