Македонските граѓани плаќаат највисоки патарини во регионот, додека патуваат по патишта во лоша состојба, со бројни оштетувања и дупки. Иако инфраструктурата не ги исполнува очекувањата, приходите од патарини бележат значителен раст.
Според официјалните податоци, само во 2023 година државата наплатила 62 милиони евра од патарини, што претставува двојно зголемување во однос на 2020 година. Овој тренд на раст на приходите не е проследен со значајни подобрувања во квалитетот на патиштата, што предизвикува незадоволство кај возачите и барања за поголеми инвестиции во патната инфраструктура.
„Компаративните анализи покажуваат дека во Бугарија се вози цел месец за 16,55 евра на автопат; во Словенија една недела чини 16 евра; во Унгарија околу 17 евра за десет дена. Во Македонија, на делницата Скопје-Демир Капија-Скопје со 12 евра (колку што е неделна вињета во Австрија) може да се вози само два дена по лош асфалтен пат.
Дополнително, поради лошите законски решенија, граѓаните во Македонија плаќаат два пати за да возат по патишта во лоша состојба: еднаш на наплатна станица и еднаш при регистрација на возилото преку надоместокот за јавни патишта за моторни возила.
Пратеничката група на Левица до Собранието поднесе измени и дополнувања на Законот за јавните патишта, со кои ќе се овозможи намалување на цените на патарините за 50 отсто и законска регулација на висината на патарината и нивната наплата“, велат од Левица.
