Ако се потврди сомнежот на Комисијата за заштита на конкуренцијата дека четирите големи синџири на маркети картелски се здружувале и договарале цени, тие ќе треба да платат вкупна казна од над 47 милиони евра. Дополнително, ќе се утврди износот што ќе треба да го плати Сојузот на стопански комори (ССК), откако ќе го достави својот Биланс на успех за 2023 година.
Во врска со случајот, премиерот Христијан Мицкоски упати јасна порака дека Владата нема да дозволи манипулации на пазарот на штета на граѓаните.
„Секој оној што мисли дека ќе се служи со трикови треба да знае дека постои Закон и ќе сноси соодветна одговорност. Сите оние што сметаат дека можат картелски да се здружуваат, мора да бидат свесни дека ќе одговараат пред институциите. Никому нема да му биде дозволено да се богати на грбот на народот – Владата тоа нема да го толерира“, истакна премиерот.
