Актуелниот министер за здравство и еден од лидерите на коалицијата „Вреди“, Арбен Таравари, преку објава на социјалните мрежи ја анализира актуелната состојба во светската политика по доаѓањето на власт на американскиот претседател Доналд Трамп, со посебен осврт на случувањата на Балканот, особено во контекст на Косово.
Таравари посочува дека глобалната дипломатска сцена значително се менува, нагласувајќи дека претседателот Трамп целосно ги трансформира надворешната политика и пристапот на САД.
„Целиот свет е сцена, а сите мажи и жени само актери… Како што ненадејно може да се распадне еден брак, така сведочиме и за драматично нарушување на американско-европските односи. Несогласувањата се сè поочигледни, а дипломатијата што исчезнува ни остава само слаба надеж дека овој јаз нема да се продлабочи до целосно раскинување. Во јавноста кружат бројни теории, шпекулации и анализи, но клучното прашање останува: Каква ќе биде судбината на светот? Балканот е чувствителен регион со длабоко вкоренети тензии. Независно од тоа што Европа има свои предрасуди и пристап кон него, едно е сигурно – доколку во регионот се разгорат конфликти, последиците нема да останат ограничени само на овој дел од светот. Новите спорови ги рушат старите баланси, но клучното прашање е до каде ќе одат овие превирања и какво влијание ќе имаат врз Косово? Доколку се донесе неправедна одлука, дури и во најмал дел, Косово ќе биде запишано во историјата како малата земја што запали искра за поголем конфликт. Последиците од такво сценарио би можеле да се претворат во нешто што некои веќе го нарекуваат можен почеток на Трета светска војна“, предупредува Таравари.
