Украинскиот претседател Володимир Зеленски во петок во Вашингтон треба да потпише документ за користење на рудното богатство на неговата земја со американскиот претседател Доналд Трамп.
Извор на „Ројтерс“ кој имал увид во нацрт-договорот изјавил дека во него конкретно не се споменуваат безбедносните гаранции што Украина ги барала од САД, ниту континуираните испораки на оружје за Киев, но се наведува дека Америка сака Украина да биде „слободна, суверена и безбедна“.
Друг извор на британската агенција посочил дека разговорите меѓу Вашингтон и Киев за идните испораки на оружје сè уште траат.
Зеленски претходно одбил да потпише верзија на договорот според која Вашингтон барал права на украинските природни богатства во вредност од 500 милијарди долари како компензација за помошта што САД ѝ ја давале на Украина од почетокот на руската инвазија пред три години.
Украинските власти истакнале дека добиле многу помалку од таа сума и се пожалиле на недостатокот на американски безбедносни гаранции за Киев во тој нацрт-договор.
Иако Украина ни овој пат не добила гаранции, САД се откажале од „наплатата“ од половина билион долари, а наместо тоа, двете земји заеднички ќе воспостават Фонд за инвестиции во реконструкцијата, при што приходите на Киев од тој фонд повторно ќе се вложуваат во експлоатацијата на рудите и другите енергетски ресурси.
Украина ќе вложува 50 отсто од своите приходи, минус оперативните трошоци, во овој фонд и ќе продолжи да го прави тоа сè додека не достигне вкупна инвестиција од 500 милијарди долари.
САД ќе обезбедат долгорочна финансиска поддршка за развој на „стабилна и економски просперитетна Украина“.
Украина располага со 22 од 50-те руди што САД ги имаат означено како критични суровини, а од сличната листа на Европската Унија, која содржи 34 минерали, Киев поседува 22.
Договорот за експлоатација на украинските рудни ресурси би можел да ѝ овозможи на Америка пристап до големи наоѓалишта, додека Трамп се залага за враќање на стотици милијарди долари американска помош.
