Македонската ММА репрезентативка Даниела Алексовска, членка на клубот „Д Стронгест“, постигна историски успех со официјалното рангирање на третото место во светот во јуниорската категорија до 52.2 килограми. Овој извонреден резултат претставува огромно достигнување не само за неа, туку и за македонскиот спорт воопшто, како и за нејзините тренери Ивица Алексовски и Стефан Пецевски, кои одиграа клучна улога во нејзиниот развој.
Даниела ја запиша Македонија во историјата на мешаните боречки вештини (ММА) со освоеното злато на Европското ММА првенство 2025. Со оваа титула, таа стана првата македонска спортистка што стигнала до европскиот врв во женска категорија, а воедно освои и значајни поени за светската ранг-листа на Меѓународната ММА федерација (IMMAF).
Во текот на изминатата година, Даниела имаше интензивна борбена сезона, забележувајќи 10 борби, од кои извојува осум победи. Покрај златниот медал од Европското првенство 2025, таа претходно освои бронзен медал на Светското ММА првенство 2024 во Ташкент, Узбекистан, како и сребрен медал на Европското првенство 2024 во Белград, Србија.
