Претседателот на партијата Алтернатива, Зеќирија Ибрахими, изрази став дека, паралелно со измената на државниот грб, треба да се разгледа и можноста за промена на химната на Македонија.
Гостувајќи во емисијата „Дијалог кај Лајм“, Ибрахими нагласи дека новата химна би требало да ги одразува сите заедници што живеат во земјата, со цел зајакнување на внатрешната кохезија и чувство на припадност кај сите граѓани.
Тој предложи три можни решенија за ова прашање. Првата опција е химната да има два различни текстови – еден за македонскиот народ и друг за албанската заедница. Втората можност е создавање химна со еден заеднички текст, кој ќе ги опфати сите етнички заедници и ќе може да се изведува на различни јазици. Третиот предлог е химната да биде исклучиво инструментална, без текст.
„За нас Албанците, мелодијата на химната не е толку проблематична, колку што е текстот на химната. Во духот на државната кохезија и во духот на добрата волја во Северна Македонија, мислам дека е во интерес на државата прашањето за химната да се дискутира во пакетот за грбот. Дали може да има два текста за химната? Не е исклучено ниту опција каде Албанците ќе можат да имаат свој текст на химната“, кажа Ибрахими во емисијата „Дијалог кај Лајм“.
