Речиси еден месец по почетокот на серијата од 20.000 земјотреси, ситуацијата на Санторини останува неизвесна и загрижувачка.
Меѓу малкумината жители кои останаа на островот по масовното иселување на околу 12.000 луѓе во првите денови од кризата, владее чувство на исцрпеност и неизвесност.
Непреспаните ноќи и постојаниот страв од можен катастрофален земјотрес дополнително ги оптоваруваат. Дополнителна загриженост внесува и збунетоста на експертите, кои сè уште не можат со сигурност да објаснат зошто земјотресите се толку зачестени, ниту да предвидат како ќе се развива ситуацијата.
Освен безбедносниот аспект, загрижува и економската штета што ја трпи островот. Туристичката сезона, која требаше да започне во март, е под голем знак прашалник.
Првиот сериозен удар врз туристичката индустрија беше откажувањето на пристигнувањата на бродовите за крстарење, кои одлучија да се пренасочат кон побезбедни пристаништа. Досега на островот пристигнале само три крузери, но шансите за нормализација на ситуацијата до Велигден, кој е значаен празник за Санторини, се минимални. Според првичните предвидувања, до јуни требаше да пристигнат 170 бродови за крстарење, а во текот на целата сезона нивниот број требаше да надмине 800.
