Специјалистот по општа хирургија, Златко Јаков кој десет години ја градеше својата кариера во Прилеп, а потоа помина 11 години работејќи како лекар во Германија, одлучи да се врати во Македонија.
Веќе речиси три месеци доброволно помага на хируршкото одделение во прилепската болница, додека ја чека својата официјална ангажираност.
„По една деценија работа во Прилеп, а потоа 11 години во Германија, мојот план отсекогаш бил да се вратам. Се создадоа поволни околности, па ја реализирав таа намера. Во моментов, во рамките на моето слободно време, се вклучувам во работата на хируршкото одделение, учествувам во дежурствата и со нетрпение очекувам да започнам со новата медицинска опрема, со која веќе имам искуство. Работата со мојот народ ми носи огромно задоволство – да се применат стекнатите знаења, да се споделат искуствата со колегите и да се придонесе за подобрување на здравствениот систем.
Секако, има многу предности што ги нуди татковината – семејството, блиските луѓе, начинот на живот. Финансискиот аспект е задоволителен, но најважно за мене беше чувството на припадност и желбата да дадам придонес тука. Од Германија го понесов најдоброто и сега сакам тоа да го применам во Македонија“, изјави денеска д-р Јаков пред новинарите.
