Владата денеска и официјално потпиша договор за донација на 255 системи за прочистување на воздухот со компанијата ЕКОТИП ДООЕЛ Скопје, водечки домашен партнер во областа на филтрацијата. Донацијата, чија вредност изнесува 1.000.000 евра, е обезбедена од ЕКОТИП ДООЕЛ Скопје, кој долги години соработува со реномираниот германски производител MANN & HUMMEL.
Како што соопшти Марија Митева, портпаролка на Владата, овие уреди ќе бидат распоредени во градинки, училишта, болници и други јавни институции каде што квалитетот на воздухот е од особено значење за здравјето на граѓаните.
„Загадувањето на воздухот останува еден од најсериозните еколошки и здравствени предизвици во Македонија. Во контекст на напорите на Владата во преземањето значајни мерки за намалувањето на загадувањето на воздухот преку капитални проекти, како Влада активно работиме на долгорочни стратегии и решенија за намалување на загадувањето, преку инвестиции во одржливи енергетски решенија, зголемена контрола на емисиите и поддршка на зелени технологии. Сепак, додека спроведувањето на овие мерки бара време, ваквите брзи и ефикасни донации од приватниот сектор се од суштинско значење за заштита пред се на здравјето на граѓаните. Сепак, успехот во оваа област зависи од заедничките напори на сите сектори. Затоа како Влада особено го истакнуваме значајниот придонес на приватниот сектор, како што е оваа донација од 255 системи за филтрација на воздухот во вредност од 1 милион евра“, кажа Митева.
