Првиот вицепремиер, Изет Меџити, во гостувањето во емисијата „Дијалог во Лајм“ кажа дека македонската химна би можела да биде и без текст, само со музика, по што му одговори лидерот на ЗНАМ, Максим Димитриевски.
Димитриевски вели дека не е изненаден од коментарот на Меџити, меѓутоа смета дека Македонија има идеална химна и нема потреба истата да биде променета, а притоа даде ироничен коментар до вицепремиерот.
„Не сум изненаден. И по можност да се пее тивко, а не гласно, така? Ние имаме химна со полн легитимитет, која реално ја отсликува нашата историја, со тоа како се стекнавме со независна држава. Таа ги исполнува сите услови, наративи, кои се во општеството. Исто така, има континуитет од Крушевското востание и го отсликува реално крушевскиот манифест, дополнително определбите на АСНОМ и желбата на македонскиот народ како основоположник на оваа држава заедно со припадниците на другите народи кои живеат на територија на Македонија. Имаме идеално знаме, идеална химна и грб“, кажа Димитриевски.
