Поранешната пратеничка во македонското Собрание, Весна Дамчевска Илиевска реагираше на изјавата на актуелниот пратеник Петар Ристески, кој во гостувањето во емисијата „Здраво Македонијо“ кажа дека не злоупотребил ниту еден денар.
Многумина го напаѓаа дека е рекордер и дека земал 14.300 евра во 2024 година, по што Ристески посочи дека доаѓа од Прилеп и затоа патните трошоци се повисоки.
„Доаѓам од Прилеп, град кој е најмногу оддалечен од Скопје. Трошам околу 3.000 денари при едно патување до Скопје, а Собранието ми исплаќа околу 4.500 во зависност колку е нафтата. Нема да бегам, ниту да се правдам, затоа што немам злоупотребено ниту еден денар. Возам автомобил кој го купив 35.000 евра, а сега не можам да го продадам ниту за 15.000“, кажа Ристески.
Дамчевска Илиевска објави статус на нејзиниот профил на Фејсбук како реакција на изјавата на Ристески.
„Незгодно е, од туѓиот срам.
Да не верува човек што слуша и гледа. Колеги, пратеници, поранешни, сегашни, идни, луѓе златни, како е можно некој од таа позиција да говори дека е во зијан со трошоците за патарини!?
Од Прилеп до Скопје дневен трошок исплатен на пратеник во вредност од 4500 денари, било малку, па биле во зијан!? Па со тие пари со авион до Виена ќе одиш и ќе се вратиш со Vizzair!
На плата од 120000 денари, да се жалиш дека си во зијан со патарина од 4500 денари е потценување на интелигенцијата на народот.
Да се биде пратеник треба да е чест и посебна одговорност. Тоа не треба да е ќар, печалба!
Таму треба да се најдобри од најдобрите во се’!
Како пратеници од Скопје не сме земале патарини, а платите ни беа 60 000 денари и никој не се пожали. Напротив, сами сме си обезбедувале превоз и до работа и низ цела ИЕ која многу често ја поминувавме на средби со граѓаните. Имавме канцеларии каде секој граѓанин од нашата ИЕ можеше да се сретне со нас секој петок. Разни предлози и иницијативи од таа канцеларија произлегоа и се решаваа. Сега немам со очи видено пратеник на терен, само на ФБ слики од приредби во сенката на Градоначалниците. Нема канцеларија на пратеник, се укина, како можна “закана” по позицијата на локалниот вожд.
Не се сите без осет, има и со високи вредности и компетенции, кои, барем не се топорат да се правдаат и да бранат нешто што не се брани.
Што направивте бре луѓе?“, објави таа.
