Опозициската партија ДУИ преку соопштение искажа жалење затоа што државните институции на Република Македонија не честитале Ден не независност на Косово.
ДУИ се налути затоа што ниту една институција на државата, меѓу кои и Претседателот, не упатиле честитка, а соопштението може да го прочитате во продолжение.
„Со жалење и сериозна загриженост го констатираме преседанот што се случи оваа година — по првпат, институциите на државата, вклучително Претседателот, Премиерот и Министерот за надворешни работи, не упатија официјална јавна честитка по повод Денот на независноста на Република Косово.
Овој чин не само што е дипломатски превид, туку и директен сигнал кој го поткопува духот на добрососедство и регионална соработка.
Истовремено, со сите државни почести, беше пречекан Милорад Додик — политичка фигура позната по своите деструктивни ставови кон евроатлантските процеси и принципите на регионалната стабилност.
Оваа очигледна диспропорција во односот кон соседите испраќа загрижувачка порака за насоката на нашата држава.
Таквото однесување е резултат на растечкото влијание на концептот на „Српскиот свет“ во Северна Македонија — проект кој претставува закана за суверенитетот, европската перспектива и стратешките интереси на државата“, соопшти ДУИ.
