Зеленски со реакција по состанокот на Русија и САД: Искрено, не ми е гајле

Украинскиот претседател Володимир Зеленски изрази незадоволство од средбата меѓу американски и руски претставници во Ријад.

Медиумите потсетуваат дека на овие преговори не присуствувал ниту еден претставник на украинската влада, што дополнително ја продлабочи загриженоста на Киев.

Зеленски зборуваше за ова прашање на прес-конференција во Анкара, каде што се сретна со турскиот претседател Реџеп Таип Ердоган. Тој нагласи дека со својот домаќин детално разговарале за глобалните процеси кои би можеле да доведат до завршување на војната и анализирале различни можности за постигнување одржлив мир.

„Од суштинско значење е сите преговори за ставање крај на конфликтот да бидат транспарентни и да не се одвиваат зад грбот на Украина“, истакна Зеленски. Тој додаде дека траен мир може да се постигне само доколку сите засегнати страни, вклучително Америка, Европа и Украина, седнат на преговарачка маса и водат отворен дијалог.

Поради оваа ситуација, Зеленски ја откажа планираната посета на Саудиска Арабија, посочувајќи дека Киев не бил информиран за состанокот во Ријад и дека за него дознале од медиумите.

„Не знам кој ќе остане, кој ќе замине или кој планира да учествува. Искрено, не ми е гајле. Она што е важно е како нè перципираат нашите партнери. Украина секогаш била искрена и транспарентна во своите намери, а за да избегнеме недоразбирања, решив да не патувам во Саудиска Арабија“, заклучи украинскиот претседател.