Полициските службеници од сите осум Сектори за внатрешни работи при Бирото за јавна безбедност (БЈБ) на Министерството за внатрешни работи (МВР) и изминатиот викенд (14, 15 и 16 февруари) продолжија со засилените сообраќајни контроли низ целата држава.
Во рамките на акцијата, изречени се вкупно 3.142 санкции за различни сообраќајни прекршоци, во согласност со Законот за безбедност на сообраќајот на патиштата и Законот за возила. Од нив, 1.314 казни се веќе наплатени на лице место.
„Според статистичките показатели прекршоците по основ на пречекорување на брзината на движење убедливо предничат така што евидентирани се вкупно 1.498 прекршоци, во споредба со 535 издадени платни налози по основ на непрописно паркирање. Воедно, што е особено важно за анализа е фактот што за викендот зголемен е бројот на откриени возачи што управувале возило без возачка дозвола – 247, како и возачи кои што управувале возила под дејство на алкохол-111“, соопштија од МВР.
Министерството за внатрешни работи апелира до сите учесници во сообраќајот да ги почитуваат правилата и прописите, со цел зголемување на безбедноста на патиштата и намалување на сообраќајните незгоди.
