Во вторник, на 11 февруари, при редовната утринска проверка на живеалиштето на берберските овци во скопската Зоолошка градина, вработените пронашле неколку угинати животни.
Според официјалните информации од градината, овците немале видливи повреди, ниту пак претходно покажувале знаци на болест, што ја прави оваа ситуација уште понеобична и загрижувачка.
Веднаш по откривањето на несаканиот настан, биле алармирани надлежните институции. На лице место пристигнале инспектори од Агенцијата за храна и ветеринарство (АХВ), како и стручни лица од Факултетот за ветеринарна медицина, кои започнале со детална истрага за да се утврдат причините за угинувањето.
„Во текот на минатата недела, поточно во вторникот ( 11.02), во живеалиштето на берберски овци при редовна утринска контрола пронајдовме угинати животни, кои немаа видливи знаци на повреди, ниту пак претходно покажале знаци на болест.
Веднаш беа повикани инспектор од Агенција за храна и ветеринарство (АХВ) и стручни лица од Факултетот за ветеринарна медицина, кои направија целосен увид на лице место и ја отпочнаа постапката за обдукција на угинатите единки.
Причината за смртта ќе биде соопштена кога ќе бидат направени сите анализи и ќе ги добиеме резултатите од обдукцијата.
Се сомневаме дека станува збор за труење од гранки од растението тиса (taxus baccata) кое може да биде отровно за животните.
Нашата установа редовно и транспарентно известува за сите случувања, а доколку се случи немил настан, веднаш ги известуваме сите надлежни институции со цел брзо постапување и откривање на причините“, соопштија од Скопската Зоолошка.
